የመዳን እውቀት

መጽሐፉ በሁለት ዋና ዋና ክፍሎች የቀረበ ነው፡፡ አንደኛው ክፍል ስለመዳን ምንነትና መዳን እንዴት እንደሚገኝ የሚያስረዳ ሲሆን ሁለተኛው ደግሞ የተገኘውን መዳን አጥብቆ በመረዳት እስከመጨረሻ መጽናት እንደሚያስፈልግ የሚገልጽ ነው፡፡ መጽሐፉ ማንኛውም አንባቢ መልእክቱን እንዲረዳ በማሰብ በቀላል አቀራረብ የተጻፈ ሲሆን ያዘለው እውቀት ግን ጥልቅ የሆነውን የእግዚአብሔር የማዳን አሰራር የሚያበራ ነው፡፡ 

‹‹መዳን›› የሚል ርዕስ በተሰጠው በመጀመሪያው ክፍል የሰው ዘር ሁሉ በኃጢአት እንደወደቀና ያለምንም ልዩነት ሰው ሁሉ መዳን የሚያስፈልገው መሆኑ፣ እግዚአብሔር ደግሞ በበኩሉ የመዳንን የተስፋ ቃል እንደሰጠ፣ ያም የተስፋ ቃል ጌታ ኢየሱስ ክርስቶስ በስጋ ሲመጣ እንደተገለጠ፣ ይህም የተገለጠው የተስፋ ቃል በወንጌል ስብከት ለሰው ልጆች ሁሉ እንደሚደርስና በወንጌል የሚታወጁት የመዳን መልእክቶች በዝርዝር ቀርበዋል፡፡ እነዚህ በአምስት ምዕራፎች ተከፋፍለው የቀረቡ ሲሆን በአምስተኛው ምእራፍ ላይ የዳግም ልደትና የመንግሥተ ሰማያት መክፈቻዎች ምስጢራት ተብራርተዋል፡፡ እነዚህም በወንጌል የሚታወጁት የመዳን መልእክቶች ናቸው፡፡ ይህ የመጀመሪያው ክፍል የመጽሐፉን የመጀመሪያ 142 ገጾች ወይም 63% ያህሉን ይሸፍናል፡፡